دوّرها ..وعطيني شحطة

بلّشنا الصيفية بفتح الإسلام...وهي راح تخلص الصيفية على فتح الإسلام..
وبين هداك وهي..قننوا الكهربا ,ونشفت المي
وطلع قرار سحب السيارات ..وبعد شوي إعادة توزيع الدعم..وتقسيمه بين الشحم والعضم ..
ولا تحسب الشحم فيمن شحمه ورم..
ولا أحد يرحم عقولنا ..أو يعيرها أدنى إهتمام
قالوا :فتح الإسلام من عنا ..سيري عالدرب السالك,هي صناعة سورية
بعدين: لقطوا أكتر من 80 واحد منهم , وما طلع واحد حكى إنو سوريا دربتو أو هو عميل لها..
رجعوا قالوا: لأ مو هدول..القيادات جوا المخيم ..هيي عميلة لسوريا..
بعدين : عرفنا إنو القيادات سعودية ,ولديها من الدولارات ما يوظف المئات من الشباب العاطلين عن العمل والأمل عندنا...
فقالوا: سوريا تدعم الجيش اللبناني بالذخائر ..وتموّل فتح الإسلام
فبيطلع قائد هالجيش وبيقول هدول جماعة من القاعدة ماإلها سوريا علاقة فيها
فجأة بيصير هالقائد اللي كان من شوي بس..رمز والكل عم يمدح فيه ..زلمي ما لا زم يحكي بالسياسة
هادا شغلتو يحارب ويموت ..أما السياسة فليش يتّعّب راسو فيها ..يتركلنا ياها..
يعني يا إخوان حتى يمشي كل هالحكي لا زم شغلتين:
تكونوا إنتو ناس أذكياء فوق العادة ..وبتندار معكن كيف ما بدكن
ولازم نكون أغبياء زيادة ..وكيف ما درتوها نندار..
ولازم نكون نحنا وإنتو ..في جلسة تسطيل ..
ودوّرها دوّر دوّر..وعطيني شحطة..