زياديات

كان في واحد هيك بعرفو أنا عندو أمل ....يضل عندو أمل
يعني ورغم كل شي صار بهل بلاد كان بعد عندو أمل
فبلغت عنّو بصراحة ما طاوعني ضميري بلغت عنو....لقطوه... وحبسوه
وبسجن انفرادي.... يعني أفضل لا سمح الله من إنو يتعاطى أو يختلط مع موقوفين تانيين...يائسين مثلا..ويقومو يزغزغولو النوايا
طبعاااااا....زلمي عندو أمل ضبّوه
ضبّوه لما يضيع الأمل
ضبّوه ليربا الأمل بمخّو
----------------------
أكتر ناس ما بينخجلو هني اللي لازم ينخجلو
أكتر ناس ما بيسوالن يشربو قهوة....هني اللي بيضلو يعقو قهوة من ع بكرة لعشيي(بياخدو معن ترمس ع الشغل...متلان قهوة).
أكتر ناس بينقرطو هني اللي لازم يتوفقو
وين الله طيب...وين الله بها السوء المساواة
أكتر زلمي بدو ضرب...هوي اللي ما فيك عليه
أحلى ناس حلو إنون يحكو هني اللي بضللو ساكتين
شو يعني.....هيدا الحكي ...شو يعني؟!!!
------------------------
- لا لا لااااا ما في شي إطلاقا
- طيب حكيم بلكي أنا معي سرطان بالمعدة مش معقول؟؟!!
- ما معقول كان بين
- مبلى حكيم, أنا معي سرطان بالمعدة أنا حاسس فيه
- مش ممكن ما الفحص بدلنا وإللا ماااا....
- يا خيي لكان طاعون
- كيف؟؟؟؟ ما فيك الطاعون للحيوانات
- أنا حيوان
- لااا حشى قيمتك
- شو بدك يا عمي شو بيقولولك ...أنا حيوان عل أكيد لأني حاسس مية بالمية بالطاعون نفس العوارض هيّاهون
- شو عوارض الطاعون يا حبيبي ليش إنتا بتعرفا؟؟!!
- شو عوارضو معلوم بعرفا... عوارضو إني عم شوفك بنومي كتير ... وكل ما بشوفك بجي باخد موعد منك لتشوفني... وبحس فوق الدكة إنو ما برتاح إلا ما شوفك...مع إنو أنا ما بطيقك "مثلا" عفوا لأنو بس إضهر من عندك بحس إنو راجع متل ما جيت بس أبطأ مشيتي بس هياها.....هيدا الطاعون بعتقد مش هيدا الطاعون؟؟!! شو هوي لكان؟؟؟؟
-----------------------
- عوافي
- أهلا
- بتعطينا شي وقية...ـ فيه عندك سلامة ـ ...
- فيه , نعم
- بتعطينا شي وقية سلامة, بقديه وقيه السلامة ؟
- ب 75 ليرة
- وقية وقية وحده !!!
- إي نعم الوقية ب 75 ليرة
- إف هلقد صار حقا وقية السلامة
- نعم.
- طيب خلينا...عطينا شي وقيتين ندامة إذا ممكن
---------------------------------

*من مجموعة "تابع لشي تابع شي"
زياد الرحباني