حوار بين الشاعر محمود درويش والفنان ناجي العلي

حوار بين الشاعر محمود درويش والفنان ناجي العلي درويش: شو بشوفك
مستلمنا هاليومين يا ناجي... حاط دبساتك على طحيناتنا.. شو في؟
العلي: يا عمي ما تزعل مني.. هاي الشغلة مش ضدك شخصيًا.. أنا ما في
بيني وبينك إلا كل خير ومحبة.. وانت عارف؟
درويش : لا .. أنا زعلان بجد.. ليش كل اللي رسمته وكتبته ما بخليني
أزعل؟
العلي: يا محمود إنت إلك حق تزعل.. لو أني ما تعرضت إلك وأهملتك.. مثل
ما بهمل دائمًا الساقطين.. أنا انتقدتك لأنك مهم لشعبك، وأنت لازم
تفرح.. مش تزعل؟
درويش: مش أنت اللي بصنفني مهم ولا لأ. وبعد حوار تأرجح بين الغضب
والنقد.
العلي: يا عمي انتو بتقولوا بمد الجسور مع اليسار الإسرائيلي.. مدو زي
ما بدكوا... بركي الجسور بتقيدكم مستقبلاً.. أما أنا وجماعتي فلا.. إحنا
يا عمي إلنا جسورنا..جسورنا إحنا مع الناس المشردة.. ممدودة بخط واحد
ما في غيره.. من باب المخيم لباب الحرم.. مع أهلنا في الداخل.. هاي
جسورنا وما بنعرف غيرها.. وإحنا بننتقد كل واحد بيحكي هالحكي..
درويش: آه.. بس انت مش قدي يا ناجي.
العلي: شو يعني .. مش فاهم.. الشغلة صارت شغلة قدود.. قدك وقد غيرك..
والله أنا لما برسم ما بحسب قد لحدا.. وأنت عارف يا محمود؟
درويش: هلا مش وقت المزح.. بدي ياك تفهم يا ناجي منيح اليوم.. إني أنا
محمود درويش.. إللي قادر يخرجك من لندن في أية لحظة.
العلي: أووف... والله هاي جديدة يا زلمة.. بالله عليك بتعملها يا محمود؟
وشو هالسطات اللي صارت عندك.. والله أبو رسول (الاسم الحركي لمدير
المخابرات الأردنية الأسبق محمد رسول الكيلاني) بزمانه ما قال هالحكي..
ولا صلاح نصر قبله (..) على كل حال انتو يا عمي السلطة.. انتو الدولة
والشيلة (..) هاي مش أول مرة بتصير ولا آخر مرة.. مش عملتوها قبل سنتين
في الكويت وخرجتوني؟ وقبلها قال الختيار (الاسم الذي يطلق على ياسر
عرفات من قبل أنصاره) قائدك وصديقك في ثانوية عبد الله السالم في
الكويت في الـ 75 أنو راح يحط أصابعي في الأسيد إن ما سكت.. بعدين
هالشغلة صارت مش فارقة معي هالخد صار معود عاللطم.

هذه المقتطفات من حوار تليفوني جرى بين ناجي العلي رسام الكاريكاتير
الفلسطيني المعروف أثناء وجوده في العاصمة البريطانية، و محمود درويش
الشاعر الفلسطيني الأشهر المقيم آنذاك في باريس، وقد روى العلي ملخص
الحوار مع درويش في حوار نشرته مجلة الأزمنة العربية (عدد 170 /1986/
ص14) وجاء هذا الحوار عقب رسم كاريكاتيري للعلي انتقد فيه درويش الذي
دعا إلى مد الجسور مع اليسار الإسرائيلي، وأعاد الناقد والكاتب العربي
شاكر النابلسي اقتباسه في كتابه الجديد أكله الذئب ... السيرة الفنية
للرسام ناجي العلي .