فى الجاليه فلول .. ولا الجاليه ضاربه فول؟

بالتأكيد كلنا سمعنا كلمة فلول بعد النظام المخلوع
وأنتشرت الكلمه وأصبحت بتتقال بهمه وبيسمعها الفيل والنمله
وأصبح فيه ناس داير عليها الكاس وبتشرب كل يوم لترين جاز
وناس أنطبقت عليها كلمة فلول حتى ولو خلعت الهدوم
واصبح فيه معاير ومواصفات على المفلول من نظام بعلول
وعندما تواجه المفلول .. وتقوله فى وشه .. يامفلول
يرد ويقولك. لو سمحت أنا شملول ولست من الفلول
وفى النمسا لم يضع أحد قائمه بأسماء الفلول ولا حتى العجول
ولم يكتب ثوار النمسا قائمه بأسماء الفلول علشان تعديل ألأمور
وتركوها بدون تحديد علشان وقت اللزوم يضيفو عليها سينيور وتركو كل واحد يحدد المفلول هو واهله والكل بيندهله
وطبعا كل واحد ومزاجه وزى ماهو عايز تكون طلباته
والعمليه ضاربه فى بعضيها والناس بتعض على صوابعها وأيديها
وأصبحت الجاليه والجاريه مش عارفه راسها من رجليها
والكل بيسأل مين الفلول؟ ومين المفلول؟ ومين واكل فول؟؟
وبعد سقوط مبارك وأعوانه .. وولاده ..وصبيانه
اصبحت الفلول معروفه للجاليه .. حتى ولو كان ضارب باميه
ناس بتقول أن الفلول فى النمسا موجودين وبين الجاليه مخفيين
المهم فى القصه أن كل واحد فسر معنى كلمة فلول بكلام بهلول
وكل متهم من المفلولين. بيقول الكلام ده طلع من واحد مغلول
وقبل مانعرف معنى كلمة فلول تعالو نعرف فتاوى الناس الفالين
فماذا يقول الضاربيين وعلى شعرهم فزلين
ناس بيقولو كلمة فلول جايه من كلمة فل بعد ماتشرب أزازة خل
وناس بتقول معناها (الفله فى المنفله) وصاحبتها الست فله
وناس بتقول أحنا عارفينها كده.وسمعناها من ستها.وموافقةعمها
وناس بتقولك دى جايه من كلمة فول .. بعد ماتخلطها بكمون
وناس بتقول اصحى يابو كريم للون .. دى الفلول فى كل صالون
وناس بتقول الكلمه ليها ميت معنى ولون بعد ضربها بفصيين ثوم
وناس تقولك الفلول جايه من كلمة فول .. بعد ضربه بالليمون
وناس تقولك دى كلمه جايه من كلمة صابون .. لأنه بينظف الهدوم
وناس تقولك فلول دى مع حجرين .. تبقى زى الحمام بجناحين
وناس تقول فلول ده شئ لزوم الشئ .. وكل سنه وأنتم طييبين
وناس بتقول فلول معناها شملول .. بعد مايضرب أرغول
وناس تقولك عايز تشوف الفلول .. أضربلك طبق فول
وناس تقولك فلول يعنى كل واحد .. من شغله منقول
وناس تقولك فلول يعنى .. شوية مياه مبلول
وناس تقولك فلول معناه رغيف حوواشى باللحمه وحمام زغلول
وناس تقولك فلول أصلها مجهول .. وقول زى ماتقول
وناس تقولك أصلها بلح .. بعد ماصوتى أتنبح
وكل واحد فسر كلمة فلول وهو بيقول على مسؤليتى القول
ولقيت نفسى مطلوب منى أعرف الحقيقه بعد ما أصبحت مصيبه
وبدأت أبحث عن أصل كلمة فلول علشان كلامى يكون معقول
وقلت اللحق يابو كريم الجاليه هتروح فى حديده بسبب نكته جديده
وينادو عليينا فى المطارات ويقولو. الأستاذ مفلول يركب باجور
وفى المطاعم ينادى الجرسون ويقول واحد فول .. للأستاذ المفلول
وفى المقهى يقولك عندك واحد كركديه .. لمفلول باين فى عنيه
ونروح لولادنا فى مدارسهم ونقول للمدير أنا المفلول والد ألأمور
وجدت ان الفضيحه هتبقى كبيره وهنبقى جاليه مفلوله ومقهوره
ونبقى أشهر جاليه فى العالم ونبقى جالية فلول نتيجة ضرب الفول

ودخلت على المعجم والقاموس علشان أشوف بدل الكسوف
ووجدت المعنى وسوف أعرضه على حضراتكم علشان راحتكم
والمعنى بيقول أن الفلول :تعنى القله المتبقية من الجيش المهزوم
والبعض بيقول عليها شرازم وهم الهاربنيين من معركة الصنادل
وأنها تحاول الوصول لبر ألأمان بالتبرأ من عهد الظلم والطغيان
وفى مصر بتطلق كلمة فلول على من كان فى الحكومه مكنون
هل عرفنا ألأن معنى كلمة فلول ولالسه الدماغ عمله فول؟؟

كلمة فلول ليس لها علاقه ولا بالفول ولا بالكمون ولاحتى بالليمون ماشى ياعم المفلول أنتى والمفلوله وأمنا الغوله

أخيكم/ محمد كمال (أبو كريم)
بيطلب من الجاليه تكون حريصه وبلاش كلام على الفلول
وخلى الدماغ طخين وكلو عسل وطحين
وماتنسوش المهرجان الرياضى يوم السبت علشان هنجيب مفلول
ونشرح بالتفصيل تأثير أكل الفول
Momomomo48@hotmail.com
069918100834