الإعلان رقم 4 لزياد الرحباني

مستمعينا الكرام اليكم في ما يلي الإعلان رقم 4.

وفي العناوين:

1 الخلاف، الطاولة، الحم...، الحوار عفواً، النتيجة.
2 السيادة والحرية والاستقلال.
3 اسأل مجرب.
4 التحيّتين.

وفي التفاصيل:

أولاً، طلع احد نواب الأكثرية من فترة صباحية على التلفزيون لأنو الظاهر ما كان عارف شو بدو يعمل، يمكن، و(ساءب) اتصلوا فيه "معاليك فينا نستضيفك اليوم أو بكرا؟" قلن اليوم. لف ورجع دغري لعندن قد ما انبسط. تلفزيون! مش انو راديو.
المهم من ضمن اللي طمنا فيه، جملة وكررها. قال إذا كان في خلاف وما عم نقدر نوصل لنتيجة المفترض نعود للحوار لنوصل لنتيجة وما يعود في خلاف. هون انتهى تصريحه.

هالشي فعلاً كتير تصريح صحيح (موسيقى). ورجع سئل، طيب اذا انتهى الحوار أستاذ وبقي الخلاف وما صار في نتيجة؟ جاوب بمعنى ما منتمنى ذلك، منتمنى نوصل لهالشي لأنو... ما منتمنى نوصل لهالشي لأنو اذا ما صار في نتيجة بيبقى الخلاف وما بيجوز لأنو نحنا بدنا نتوصل لنتيجة. ما لشو بالضبط الحمار. الحوار عفواً.

أعزائي المستمعين بفتكر هيك رح نقضيها (موسيقى).

أنا رح أعرض شي تاني فيكن تسمعوه. إذا كان في خلاف وما عم نقدر نوصل لنتيجة خلينا، أولاً نوصل لنتيجة وما يعود في خلاف، هي أعظم شي بالعالم.
هي عادة بيوصلوا لها لسوء الحظ أسرع شي ناس ما في بيناتهم خلاف ولا بعود بدهم طاولة للحوار... ولا للحمار.

أو ثانياً، خلينا نوصل لخلاف وما نطلع بنتيجة ونقول الحقيقة، هلق شو بيترتب عليها. حرب أهلية، هبوط اسهم سوليدير، عدم انتعاش بالسياحة... بيكون هالشي طبيعي لأنو ريحتو بتطلع واللبنانيين بيتدبروا متل ما تدبروا من ثلاثين سنة. هيدي هلق حدّدوها ثلاثين، وبِرَغلْجُوَا على هالاساس.
هلق ثالثاً، خلينا نقول بأقصر الطرق طلعنا بعد طاولة الحوار بالنتيجة، والنتيجة هيي خلاف. ساعتها... شموع. نوع شموع مظبوط. ونستعد نحنا وياكم يا أخوتي لكل الاحتمالات. Au revoir et merci

ثانياً، هلق بنهاية المطاف انسحب الجيش السوري من لبنان وانسحبوا مخابراته. وافق على ذلك الامين العام للامم المتحدة كوفي أنان. طبعا فارس سعيد ما وافق ولا الياس عطالله ولا الوزيرة نايلة على الغصون، معوض.

بس هني انسحبوا وكمان بإشارة من كوفي انان، والأهم والأفعل، بامتعاض سني وتحديداً بيروتي سعودي. ولولا هذا الامتعاض الاخير ما كان في شي بيسحبهم. لا مليون ولا مليون ونصف. أساساً القرار 1559 من اي متى طلع وما انسحبوا. وصار شي، واحد، هو انو تم اغتيال الرئيس رفيق الحريري.

يا أخوان، اخوان الصفقة، يا أخوان بالوطن، يا اخوان المسلمين، يا أخوان السامعين، يا أخوان أخوات ستين ألف أخوات كذا، يا أخوان الأخوة، يا أخوان البلية، يا أيها الضالين والضالات.

في سؤال، هلق بيتوجه لأكثر من إنسان، بس نحنا رح نوجهه لشخص لأنو كان قائد ميليشيا. يعني مسلحة، منظمة وكان إلها سيطرة بفترة كبيرة على احدى المناطق اللبنانية. هل بيرضى رئيس الهيئة التنفيذية في القوات اللبنانية، يشوف الطيران السوري عم بيقوم كل يوم بطلعات بالأجواء اللبنانية؟ اكيد لأ. يا عيني، يا عيني ركبت. اذاً كيف بيقبل، الطيران الإسرائيلي يرتكب هالشي.

ومن وقت ما خلق أنا ما بقبل، انو هو يقبل. خاصة كونه مقاوم لبناني تاريخياً لأي غريب، ومع السيادة وبعدين بيجو هوديك الحرية والاستقلال، لوقتها. بس السيادة.

لازم يجند ميليشيا القوات اللبنانية، اللي ما عادت منحلة، وبلشت تعمل حواجز على طرق الأرز الى جانب، بحسب تصنيف جوقة البنتاغون والامم المتحدة المشتركة، ميليشيا حزب الله. حزبو الله. خاصة انو سيد او سيّد من نادى بالسياسة. غيره (موسيقى).

ثالثاً، بيقول متل من أمتالنا، سآل مجرب وما تسأل حكيم. هالمثل اليوم صار بينضفلو. سآل مجرب ولا تسأل حكيم خاصة اذا كاين صرلو محبوس من 11 سنة. وكلنا طالبنا انو يفرج عنه. انا شخصياً طالبت بالـ97 على تلفزيون ولا إلو هلق، بيقولو اسمو الـ LBC، ببرنامج معروف، بإنو مش مفهوم ليش محبوس هالشخص وحده. بس يعني اليوم لازم ينترك له وقت تيرجع يصير مجرب وشوية وقت اطول ليصير عن جديد حكيم. هيدا طبعاً بسبب اللي قضاه بهالـ 11 سنة. يا ريت بيعطي حاله هالوقت، شوية وقت لنعرف بس يحكي شو بدنا نجاوبه. (موسيقى).
ما بدنا نرجع نبلش من الأول (موسيقى).

رابعاً: التحيّتين.
تحية وبعد. عفواً عن جديد، تحيتين وبعد.
تحية للنائب الجنرال عون وللأمين العام السيد حسن نصرالله. ليه؟ لأنو بنصر الله وعونه، النصر لنا.
الإمضاء: شيوعي فردي، بيعتقد ما عدا منير جنبلاط بركات، انو كل الشيوعيين الرسميين، مع ما ورد هلق (موسيقى) مل يسارك، تأهب، استرح. لأ. قف. واستعد لكل الاحتمالات.

الإعلان بثته أمس إذاعة صوت الشعب